اسلام آباد۔11فروری (اے پی پی):وزیر خارجہ مخدوم شاہ محمود قریشی آکھیے جو جنوبی پنجاب صوبہ محض تنقید توں نی ، آئینی ترمیم توں بݨسی ، کیا بلاول ایں آئینی ترمیم کیتے ساݙے نال تعاون کوں تیار ہن ۔ جنوبی پنجاب دے حوالے ںال جمعے کوں آپݨے بیان اچ وزیر خارجہ آکھیے جو بلاول بھٹو دی ناسمجھی اتے انہاں دے استاد نالائق ہن۔انہاں آکھیے جو بلاول بھٹو کوں لکھیاں ہوئیاں پرچیاں ݙتیاں ویندن ، بلاول بھٹو کوں حالی تئیں ادراک کائنی جو او کیا آکھدا پئے تے حقیقیت کیا اے ،جیویں جیویں ویلھا گزرسی بلاول سمجھ ویسن جو محض تنقید توں جنوبی پنجاب صوبہ نہ بݨسی ، جنوبی پنجاب صوبہ آئینی ترمیم توں بݨسی ،میݙا سوال اے جو کیا بلاول آئینی ترمیم کیتے ساݙے نال تعاون کرݨ کیتے تیار ہن ۔شاہ محمودقریشی آکھیے جو جے جنوبی پنجاب صوبے کوں عملی جامہ پواوݨ چاہندن تاں آؤ رل تے آئینی ترمیم کروں۔انہاں آکھیے میں ٻل پیش کرینداں پیاں جے تساݙی نیت صاف ہووے تاں آپݨا ووٹ ݙویجو تے جنوبی پنجاب کوں حق ݙیواؤ ۔
