اسلام آباد ۔ 2 جون (اے پی پی) قومی ایئر لائن پی آئی اے دے بدقسمت طیارے pk-8303 دے حادثہ اچ جاں بحق تھیونڑ آلے 97 مسافراں تے عملے دے ارکان اچوں 87 مسافراں دی شناخت مکمل کر گھدی گئی اے باقی ماندہ 10 میتاں دی شناخت دا عمل جاری اے ۔ منگل کوں وزارت ہوا بازی ڈویژن دے حکا م اے پی پی کوں ڈسائے جو جناح انٹر نیشنل ایئر پورٹ دے نیڑے لینڈنگ دی کوشش کریندے ہوئی تباہ تھیونڑ آلے پی آئی اے دے طیارے pk-8303 دے 97 مسافر تے عملے دے ارکان جاں بحق تے 2 مسافر معجزاتی طور تے محفوظ رہیے ہن، وفاقی وزیر ہوابازی غلام سرور خان دی ہدایت تے ایں المناک حادثے دے بعد وختی امدادی کاروائیاں دا آغاز کیتا گیا تے ہمدردی دے جذبے نال سرشار ٹیماں امدادی کاروائیاں اچ حصہ گھدا جیں دے بعد نادرا تے بئے متعلقہ فرانزک لیبارٹری ماہرین میتاں دے ڈی این اےز دی مدد توں میتاں دی شناخت دا عمل شروع کرڈتا ہئی ۔ انہاں ڈسائے جو ہنڑ تئیں 87 میتاں دی شناخت تھی چکی اے جڈاں جو باقی ماندہ 10 میتاں دی شناخت وی پوری کر گھدی ویسی ۔ انہاں ڈسائے جو قومی ایئر لائن ولوں70 دے نیڑے شہداءدے وارثاں کوں معاوضے دی ادائیگی پوری کر گھدی گئی اے تے فی کس دے حساب نال 10 لاکھ روپے معاوضہ ڈتا گئے ایں عمل کوں تکھا کرنڑ دی ہدایت کیتی گئی اے جڈاں جو زمین تے تھیونڑ آلے ضیان دا سروے کیتا ویندا پئے، امید اے جو اے عمل وی وختی پورا کر گھدا ویسی جیں دے بعد انہاں کوں معاوضے دی ادائیگی دا اعلان کیتا ویسی ۔
.jpg)
