اسلام آباد۔15اگست (اے پی پی) وزیرِ اعظم محمد شہباز شریف سیلاب متاثرین کوں ترائے ݙینھ دے اندر 50 ہزار روپے فی ٹٻر امداد، نقصان دے تخمینے کیتے سانجھا سروے پنڄ دی بڄائے ترائے ہفتیاں اچ پورا کیتا وںجے۔ وزیراعظم آفس دے میڈیا ونگ توں جاری بیان موجب انہاں اے ہدایت سنوار کوں سیلاب بارے ٻݨائے ڳئے ریلیف کوآرڈینیشن کمیٹی دے اجلاس دی صدارت کریندیں ہوئیں آکھی۔ اجلاس اچ وفاقی وزرا مفتاح اسماعیل، احسن اقبال، مریم اورنگزیب، مرتضیٰ جاوید عباسی، مولانا اسعد محمود، مشیرِ وزیرِ اعظم قمر الزمان کائرہ، چیئرمین این ڈی ایم اے لیفٹیننٹ جنرل اختر نواز اتے متعلقہ حکام شریک تھیے جڈانجو وفاقی وزیرِ ہاؤسنگ مولانا عبدالواسع، وزیرِاعلیٰ بلوچستان عبدالقدوس بزنجو اتے رکنِ بلوچستان اسمبلی ثناء اللہ بلوچ وڈیو لنک دے ذریعے شریک تھیے۔ وزیراعظم ہدایت کیتی جو سیلاب زدہ علاقیاں اچ سارے متاثرہ گھراں کوں 30 ہزار دی بجائے 50 ہزار روپے فوری ݙتے ونڄن۔ سیلاب متاثرہ ٹٻراں کوں 50 ہزار نقد رقم این ڈی ایم اے دی سرپرستی اچ بینظیر انکم سپورٹ پروگرام دے ذریعے ݙتی ونڄے۔ اجلاس کوں ݙسیا ڳیا جو بارشاں دے اڄوکے سلسلے پاروں سیلاب نال تھیوݨ آلے نقصان دے تخمینے کیتے صوبیاں دی سانجھ نال سروے بعد اچ شروع کیتا ویسی۔ اجلاس کوں ݙسیا ڳیا جو سروے پورا تھیوݨ تئیں حکومت بی آئی ایس پی دے تحت متاثرہ ٹٻراں کوں 30 ہزار روپے دا فوری ایمرجنسی کیش ݙیسی۔ وزیراعظم ریلیف دی رقم 30 توں ودھا تے 50 ہزار کرݨ دی ہدایت کیتی اتے این ڈی ایم اے کوں ایندی نگرانی کرݨ دی ہدایت کیتی۔ اجلاس کوں ݙسیا ڳیا جو وفاقی حکومت بین الاقوامی ڈونرز اتے ٻئے فلاحی اداریاں نال مسلسل رابطے اچ اے۔ ایں بارے ایشین ڈویلپمنٹ بینک (اے ڈی بی) اتے ورلڈ بینک حکومت کوں ایمرجنسی ڈیزاسٹر ریلیف فنڈ دے تحت سیلاب پاروں تباہ تھیے سٹرکچر دی تعمیر نو اتے بحالی کیتے ضروری فنڈز ݙیوݨ دا یقین ݙوائے۔
